و رجعنا

و الله و الأيام رجعت بينا تاني
من كذا سنة
تقريباً ما بين سنتين 2007 و 2008
كان في منتدى كنت بحبه جدااا
منتدى كله نواعم × نواعم
- طلعت عيني عشان أقنعهم إني بنت و أسجل معاهم -
^ـ^
المهم في الفترة بين السنتين دول
و في المنتدى ده
كنت نشيطة جداا
تقريباً الفترة دي كانت أوج تحركاتي و نشاطات في كل حاجة
من ضمنها النت و مجال دراستي و تخصصي
و حاولت أجمع بين الاتنين دول
فكانت النتيجة إني بقيت مشرفة قسم الأطفال و الطفولة في المنتدى
و عملت سلسلة سميتها " أنا و طفلي "
كنت كل مرة - بمعدل مرة أسبوعياً أو كل أسبوعين مش فاكرة أوي - بنزل موضوع و بتناوله أولاً من وجهة نظر الطفل و بعدها من ناحية الأم و أرجع للطفل تاني ، و أختمه برسالة من الطفل للأم
كنت مبسوطة بالسلسلة جداً خصوصاً إني لاقيت تفاعل و اشتراكات ناس كتير بتسأل و بتفكر معايا


و هوووووب
فجأة


المنتدى فجأة و بدون أي أسباب واضحة
رغم إنه كان كبير و بقاله سنين و اتشهر في الصحافة و ما إلى ذلك - أكيد مش في مصر دي كانو ناس في العسل في مصر أيامها .
و الناس الحلوة اللي عرفتها اتفرقت
و مبقتش عارفة أكلمهم زي ما كنا بنعمل
" و تفرقت بنا سبل الحياة " :D


الكارثة كمان ... إني كنت بكتب مني ع المنتدى عدل
يعني من الآخر
معنديش و لا نسخة من اللي كنت كتبته قبل كده
إلا موضوع واحد تقريباً كنت نسخته أو قعدت أفتكره عشان أدخل بيه مساقة اكتب في الجامعة برعاية جوجل


وجاتلي حالة إحباط لضياع كل حاجة فجأة
بس بقالي فترة عمالة بفكر أشد همتي تاني
أرجع أعمل منتدى عن الأطفال - كنت عملت واحد قبل كده برضه مع صاحباتي من الكلية - و كنا شغالين إلى حد ما كويس
و أكتب فيه السلسلة من تاني - و أعمل نسخ المرة دي مش زي اللي فاتت
و أرجع من تاني نشيطة زي ما كنت أعرف عني
و دعواتكم
المنتدى بدأت فيه
و هجيب مواضيعي من المسابقة
و ربنا يسهل
قولوا يا رب
^ـ^